Barhayot siymolar

      Xorazm  viloyati  Gurlan  tumanidagi  41-maktabda  "Alisher  Navoiy – so`z  san’atining  sultoni”  mavzusida  adabiy  kecha  o`tkazildi.  Maktabning 7 – 8-sinf  o`quvchilari  mutafakkir  shoirning  g`azal,  ruboiy  va  tuyuqlaridan  namunalar  o`qib,  ularda  ilgari  surilgan  insonparvarlik g`oyalarining  bugungi  kundagi  ahamiyati  haqida  aytib  o`tdilar.

  "Navoiy mavlono Lutfiy huzurida”, "Navoiy va Darveshali suhbati” mavzularidagi sahna ko`rinishlarida Navoiyning bolaligida yozgan she’ri ustozi Lutfiy tomonidan yuksak baholanishi yoki ukasi Darveshaliga yurt obodligi, ilm-fan rivoji yo`lida ko`p ishlarni amalga oshirish orzusi borligi haqidagi so`zlari o`quvchilar tomonidan samimiy yetkazilgani yig`ilganlarda chuqur taassurot qoldirdi.

"Navoiy XX va XXI asr olim va yozuvchilari talqinida” mavzusidagi ma’ruzada mutafakkir ijodi bo`yicha tadqiqot olib borgan olimlar va ijodkorlar fikrlaridan iqtiboslar keltirilib, ushbu tadqiqotlarning ahamiyati xususida mulohaza yuritildi.

Mahmud Rajabov, "Ma’rifat” muxbiri

"Ma’rifat” gazetasi 2015 yil 14-fevral, shanba № 13 (8766) sonidan olindi.